പൂക്കളം കാണാൻ മാവേലി എത്തി...ഓണാഘോഷം കെങ്കേമം!

 നാടൻ പൂക്കൾ കൊണ്ടു തീർത്ത പൂക്കളം കാണാനും ഓണാശംസകൾ നേരാനും മാവേലി എത്തിയപ്പോൾ കുട്ടികൾ കയ്യടിച്ചു സ്വീകരിച്ചു.പൂക്കളത്തിനരികിൽ കുട്ടികളോടൊപ്പം അൽപ്പനേരം ചെലവഴിച്ച മാവേലി പോകാൻ നേരത്ത് ഒന്നാം ക്ലാസ്സിലെ ഷമ്മാസിനു ഒരു മോഹം ..മാവേലിയുടെ കട്ടി മീശയിൽ ഒന്ന് തൊടണം! കൊച്ചു കുട്ടിയുടെ ആഗ്രഹമല്ലേ,മാവേലി സന്തോഷപൂർവ്വം സമ്മതിച്ചു.മീശ തൊടാൻ കഴിഞ്ഞ ഷമ്മാസിനും പെരുത്തു സന്തോഷം...ഓണാഘോഷത്തിന്റെ ഭാഗമായി പുഞ്ചാവി ഗവ: എൽ.പി.സ്കൂളിലെ കുട്ടികളാണ് നാടൻ പൂക്കൾ ഉപയോഗിച്ച് പൂക്കളം തീർത്ത്‌ മാവേലിയുടെ അനുമോദനങ്ങൾ ഏറ്റുവാങ്ങിയത്.തുടർന്നു നടന്ന മത്സര പരിപാടികളിൽ കുട്ടികൾക്കൊപ്പംഅമ്മമാരും ആവേശപൂർവ്വം പങ്കെടുത്തു.പാസ്സിംഗ് ദി ബോൾ ,കുപ്പിയിൽ വെള്ളം നിറക്കൽ,കസേരക്കളി,കമ്പവലി തുടങ്ങിയവയായിരുന്നു പ്രധാന മത്സരയിനങ്ങൾ.ഓരോ ക്ലാസ്സിലെയും ആണ്‍ കുട്ടികൾക്കും പെണ്‍ കുട്ടികൾക്കും പ്രത്യേകം പ്രത്യേകമായി സംഘടിപ്പിച്ച കമ്പവലി മത്സരം കാണാൻ നിരവധി രക്ഷിതാക്കളും എത്തിയിരുന്നു.അധ്യാപക-രക്ഷാകർതൃ സമിതിയും ,മദർ പി.ടി.എ യും ചേർന്ന് ഒരുക്കിയ ഓണസദ്യയും കൂടിയായപ്പോൾ ഇത്തവണത്തെ ഓണാഘോഷം ഗംഭീരമായി.പ്രധാനാധ്യാപകൻ കെ.നാരായണൻ,അധ്യാപകരായ സുരേഷ്,ജാബിർ,പ്രമീള,പരമേശ്വരി എന്നിവർക്കൊപ്പം രക്ഷാകർതൃ സമിതി അംഗങ്ങളായ നസീമ,അംബിക,ആയിഷ,സുജ,രവീന്ദ്രൻ ,വിദ്യാലയ വികസന സമിതി വൈസ് ചെയർമാൻ ദാമോദരൻ തുടങ്ങിയവരും പരിപാടികൾക്ക് നേതൃത്വം നല്കി.മത്സര വിജയികൾക്ക് മദർ പി.ടി.എ പ്രസിഡണ്ട് നസീമ.എം.പി.സമ്മാനങ്ങൾ വിതരണം ചെയ്തു.